King's Singers í Hörpu
Hinn heimsfrægi breski sönghópur, The King´s Singers, mun halda tónleika í Eldborgarsal Hörpu þann 16. september 2015 næstkomandi. King´s Singers eru margverðlaunaðir og hafa m.a. unnið til Grammy verðlauna í tvígang, árið 2009 fyrir plötuna Simple Gifts og árið 2012 fyrir plötuna Light and Gold. Árið 2013 var þeim boðið í Gramophone frægðarhöllina, Gramophone hall of fame, og heiðraðir fyrir sitt einstaka safn af útgefnum geislaplötum. Í tengslum við tónleikana munu meðlimir hópsins halda master-class í Hörpu fyrir sönghópa og kóra. Hægt verður að sækja um þátttöku á námskeiðinu fljótlega en það verður samdægurs og lýkur með stuttum tónleikum í Norðurljósum sem eru opnir almenningi og miðar fáanlegir í miðasölu Hörpu og á midi.is. Einnig getur fólk sótt námskeiðið sem áheyrendur þótt þeir séu ekki meðlimir í þeim hópum sem fá leiðsögn meðlima King´s Singers sönghópsins. The King´s Singers var stofnaður árið 1968 og heldur vel yfir hundrað tónleika á ári víðs vegar um heiminn. Upptökur á geisladiskum skipa stóran sess hjá hópnum. Efnisval King´s Singers er gríðarlega fjölbreytt og á 50 ára ferli hefur hann gefið út yfir 150 diska með yfir 2000 lögum. Hópurinn hefur frumflutt yfir 200 verk, m.a. eftir tónskáldin György Ligeti, John Tavener, Eric Whitacre og marga fleiri.